Orgullo de pai

Hoxe é destes días nos que quero presumir de filla e quero achegarvos a unha serie de traballos que veñen realizando dentro da materia de Tecnoloxía no IES A Cachada de Boiro.

Lara, Paula Vidal, Sanda e Paula García dentro dos traballos que lle mandaron facer nesta materia crearon unha cooperativa ficticia á que lle chamaron Tarchapis e coa que a través de distintos traballos audiovisuais tiñan que ir realizando diversos traballos para promover e potenciar tanto a empresa coma os produtos que deberían de realizar.

Postres ou lámpadas foron algúns dos encargos realizados e que, por exemplo, no caso dos postres serviron para recadar fondos para realizar unha viaxe escolar. Pero o mellor destas actividades é que serven para aprender e para desenvolverse dentro dun medio no que sempre é útil coñecer, que é o mundo tecnolóxico. A Paula todo isto encántalle, porque como se di no rural: «é digna filla de seu pai”, xa que todo o tecnolóxico e especialmente o mundo audiovisual é unha das miñas paixóns que por desgracia descubrín bastante tarde.

Este post, ademais de para presumir de filla, como dicía ao principio, é tamén para destacar o traballo desenvolvido no IES A Cachada, onde manteñen un contacto directo co alumnado e crean actividades diversas para que os alumnos e alumnas poden desenvolverse tamén fóra dos libros e collan conciencia do que pasa ao seu arredor e do que é o mundo real. Eu estou moi contento polo traballo realizado polos profesores e profesoras deste centro, xa que a Paula, ademais de ensinarlle e formala educativamente, tamén a están ensinando e formando como persoa, para que adquira uns valores e unha ética que tan necesaria é nestes tempos.

Só hai que ver algúns dos traballos que realizaron para que vexades cales son algunhas das súas preocupacións, como por exemplo a defensa da escola pública. E como non podía ser doutra maneira quero rematar felicitando aos seus profesores Ana Moreiras, Berta, Mariano, Joaquín, … e o resto que non me lembro dos nomes por tomarse tan en serio a súa profesión e por tratar aos nosos fillos e fillas como persoas sobre todo nestes tempos nos que hai tanto interese en desvalorizar e degradar a Educación Pública.

Acceso a YouTube (ver máis vídeos)

Acceso ao Blog de Tarchapis (ver traballo)

Deja un comentario

Este sitio usa Akismet para reducir el spam. Aprende cómo se procesan los datos de tus comentarios.